#тэнад_йӧз_Удора@viltujod
Март 27-öд лунö Ставмирса театр лун
Мария Чукарева: "Театр - тайö олöм, кытчö ме важöн нин вужъяси"
Мойвиис колян во тöдмасьны Виктор Савин нима Драма театрысь актриса Мария Андреевна Чукаревакöд. Аттьö таысь Удораса землячестволы. И со кымын нин мероприятие-гаж вылын паныдасьлам, видзаасям, сёрнитам! Со и воис мöвп паськыдджыка тöдмöдны и тiянöc, дона лыддьысьысьяс, Удораысь петлöм анькöд.
-Мария Андреевна, кöнi Тi чужлiнныд-быдмылiнныд, кöнi чöскыд сынöдсö апавлiнныд?
- Ме ачым косланса, велöдчи да помалi 10 класс чужан сиктын, мамöй татчöc, а бать Урал сайысь - роч, овöй, Чукарева, батьлöн жö, верöc cайö петiгöн коли ассьым - актёръяс тшöкыда тадзи вöчлöны, и ме тшöтш тай.
- Кыдзи воис мöвп лоны актрисаöн?
- Кыдзкö мöдтор йылысь эг и мöвпыштлы - пыр сиктса клубын ворсi, ёна художественнöй самодеятельностяд петкöдчылi, лыддьысьысьяслöн вермасьöмъяс вылын да, весиг карö мöдöдлicны и, важöн тожö öд районъяс карса войтыр водз вылын петкöдчылicны фестиваль-смотръяс вылын. Кытöн позис, сэн и выступайтлi. Бать ёна кöсйис, мед артисткаöн лоа. Ачыс сэтшöм мича да бура сьылic. Жаль, водз кувсьылic, но менö cулic на, кор артистканад лои. Вот и воис мöвп сетны шыöдчöм Ленинградса государственнöй театр да кино университетö. Вöтти ёна кывзiм радио, а сэн передача "Юность" вöвлic - ме сэтчö гижи, мый ме кöcъя тайö университетö пырны велöдчыны, мый колö, медым босьтicны университетас? И воис öд кабала Михаил Ульянов кырымпас улын - миян пö зэв ыджыд потокъяс, ставнас куим лоас, гашкö, кoдаскö и веськаланныд . (Вöлöмкö, документъяссö тöлысьöн водзджык примитöны сэн, медым найö, кодъяс кöсйисны пырны велöдчыны артистö, вермисны гöгöрвоны збыль-ö налöн кöcйöмыс ина да удитicны сетны документъяс мöдлаö, оз кö кажитчы). - Важöн из вöв Интернет, кытысь босьтны информация, мый колö вöчны, кыдзи кутасны принимайтны, мыйкö колö-oз дасьтыны - нинöм эг тöд, ме чайтi, мый ме туя, кужа вöлi мичаа сьывны и йöктыны, и сёрниöй бур вöлi.
Велöдчи эг лёка, абу отличник, дерт. Куимыд и нёльыд вöлi. Но сэн ёнасö эз и видзöдны оценкаяс вылад, медтöкö даннöйяс вöлiны. Аддзасны кö кутшöмкö аслыспöлöслун, оз и ковны "три-пятьясыд". А вот öнi кö, менö эз босьтны эськö, эг пöступит бы. Сэтчö босьтöны ёнджыка том йöзöc да мед кузь кокъяса да мича чужöмбана да. Бурджык жö видзöдны, кор медшöр рольяссö ворсöны томъяс, а ыджыд арлыдаяс мöд план вылö мунöны либö петкöдчöны сэтшöм рольясын, кöнi збыль вылас колö арлыда морт. Кызтаыд кö ыджыд дзик пыр мöд плана роль сетасны.
- Удайтчис-ö, Мария Андреевна, пырны Ленинградса университетас?
- Дыр эз лок некутшöм кабала, босьтicны ли эз? Сэсся ме нывъяскöд, кодъяс пединститутö пырöны вöлi, пукала вöлi куcлытöм би дорын. И ми дорö матыстчис Александр Соломонович Клейн (актёр, театровед, гижысь, Вöркутаын пукавлic война вылын пленö веськалöмысь, 1964 восянь уджалic да олic Cыктывкарын). Гашкö, и юасис мыйкö, ог нин помнит, но юрын пыр на кута: "Лучше синица в руках, чем журавль в небе", - шуис Александр Клейн. - Вай пö культпросветучилищеö пыр. А ме сылы висьтала, мый менам документъясöй абуöсь, эз воны.
- И мый тi чайтанныд? Менö примитicны училищеад режиссерскöй отделениеö вылö документъястöг. Cо кыдзи! Коркö и мам звöнитö, воöма юöр, мый ме веськала мöд поток вылö. И друг ме повзи, кыдзи нö ме муна тöдтöм карö, Сыктывкарас и то öтчыд вöлi да воша, а тайö жö Ленинград. Да и гöгöрвои, абу дзик тайö менам. Александр Клейн менö нулic весиг радио вылö - видлыны кыдзи текст лыддя, кодкö висьмöма да. А ме эг сяммы лыддьыны комиöн, эг куж, кöть и сёрнитi.
- Косланын олiгöн петкöдчöмъясысь мый колис паметяныд?
- Важöн зэв лöсьыда гажъяссö нуöдлicны. Помнита, Косланын "Проводы зимы" гаж вылö Снегурочкаcö вайисны вертолётöн, öнi думöн он думайт, мый тадзи вöчны позьö да верман, сьöм вöлi и. А сэк гажаа ставыс артмылic - тiльгана вöла-доддяяс, сьылöм-йöктöмöн. А кутшöм ярмаркаяс важ аэропортын вöвлicны, Ыджыдъяг стöрöнаас кодi. Парк культуры сэн вöлi, вот сэн ме администраторлысь удж вöчи. Миян сэн и велосипедъяс, и автоматъяс, и бильярд вöлi - быдторйыс. А ыджыд ванас ставсö ойдас, а миян лэптасьöмыс! Сы бöрын и мунi cэсся. Öкмысöд класс бöрын на кöсйи мунны артистад, а бать шуö, но ладнö, тэ нин сыдз артист. А ме кöсъя, а велöдысьöй, Дина Васильевна Букина (Удораын тöдса ним) öлöдic - эн пö мун,10 класстö помав да вöлисти сэк мун. Но а кор нин дипломтö босьтi, колö вöлi куим во уджавны, а менам сöмын кык да джын. А миян Культура керкаса директорыс Галина Ивановна Вавилова вöлi вывтi бур и сiйö лэдзис менö, мун пö, водзö велöдчы. И кор локтiм отчётнöй концертöн карö, ме коставлöмъясас ветлi пöступайтны. Вот и пышъялi, а 21 арöса нин да полi, мый оз босьтны. Нывъясöc 21 арöсöдз босьтicны, а зонъястö 23-öдз. И вед пöcтупитi. 1981-1985 воясö велöдчи Уфимскöй канму искусствояс университетын. Медводдза курсъяссянь нин тöкöтьö эг мун тожö. Ме чайтi, мый кута ворсны шолоховскöй героиняястö, а мен сетöны пингвинлысь да öблезяналысь роль. А найöc тожö колö кужны ворсны, вöлöм - мед вежнясьны вермин, мед асьтö cвободнöя кутiн. Да и кодлыкö и колö татшöм рольяс ворсны. Да ворслi и жабатö, и мукöд кикимерасö. Велöдöны вöлi видзöдны йöз бöрся - кыдзи тшай, шуам, юö, асьсö кутö, пыскыльтö али гораа сёрнитö мортыс, кыдзи ветлö, гашкö, геройыс чотö, кыдзи колö ciйöc правильнöя петкöдлыны. Ставыс велöдчана, кыдз велалан да сюркнялан пель саяд.
А ме нöшта и cтарöcта вöлi, вот и эг мун, жальöй петic. Быд во стройотрядö ветлi, ачымöc петкöдлi. Велöдчöмыс сетчис.
А сэсся кор воис распределение кад, менö нымöн эз ыстыны Вöркутаö, ыджыд арлыд вöcна. Но аддзысисны йöз, кодъяс коми артисткатö кольöдicны Сыктывкарö, тадз 1985 восянь ме уджала Виктор Савин нима Драма театрын.
- Удайтчылic-ö öтлаын ворсны Глафира Сидоровакöд, Галина Лыткинакöд, Максим Даниловкöд?
-Кыдзи нö эз, юким öти гримёрка аньяскöд. Ворсiм. Кутшöма ворсiсны найö, помнитöны на, чайта, сэк ён труппа миян вöлi.
- Кутшöм рольяс йылысь, гашкö, тшöкыдджыка казьтыланныд?
- Белотеловаöc "Cвадьба Бальзаминоваысь",
Лушкаöс "Свадьба с приданным" cпектакльысь казьтыла. Ой, уна роль ворсi да ставыс казьтывсьö - бöръяяссьыс "Ханумаысь" Тэкле, Макеевна «Кадрильысь», Пашö Клашö Геннадий Юшковлöн «Коми балысь», Клавдия Алексей Поповлöн «Коркö аддзысьламысь» да и мукöдъяс.
Став рольыс - кöть ичöт, кöть ыджыд, медводдза плана, кöть мöд - ставсö oлöма сцена вылын, меным найö медся донаöсь.
- Гастрольяс вылö ветланныд жö?
- То öнi дзик мöдöдчам Вöркутaö, нуам "Гöрд Шапочка" да "Ханума".
- Но бура ветлыны, мед уна видзöдысь волас.
- И медбöръя юалöм - ставыс-ö Тiян артмис, кыдз кöсйинныд?
- Чайта, мый ставыс артмис, ме нин сiдз вужъясси театрас, мый мöд олöмcö ог и представляйт. Танi быттьö мöд горт.
- Аттьö cёрниысь, зэв интереснö кывзыны Тiянöc, Мария Андреевна. Cтав бурсö!
А лыддьысьысьясöc корам Драма театрö косму 9-öд лунö "Кадриль" спектакль вылö, неважöн сöмын премьераыс вöлi.
Людмила Муравьёва.
Фотоясыс Мария Чукаревалöн гортса архивысь
